Тренерот на Наполи, Антонио Конте, беше пресреќен по победата од 0-1 над Рома на „Олимпико“. Тој ги пофали своите фудбалери за начинот на кој беше остварена победата – „со авторитет и постојани напади“. Според него, овој успех е целосно заслужен.
„Да дојдеш на ‘Олимпико’ и да играш со таков авторитет како ние, да напаѓаш постојано – тоа не е лесно. Рома доаѓаше по серија позитивни резултати, беа пред нас на табелата и се многу добар тим. Задоволен сум затоа што видов карактер од момците, ги погледнавме право в очи од самиот почеток. Многу сум задоволен. И покрај сето тоа, не можеме да го игнорираме фактот дека сме во исклучително тежок период со многу повредени играчи, а тоа ќе продолжи уште некое време. Не дека сум загрижен, но се надевам дека играчите со кои моментално располагам ќе останат здрави, инаку проблемите ќе бидат уште поголеми“, започна Конте.
„Добрата вест е што тимот реагира одлично на сите овие отсутни играчи. Мораше да ја смениме тактичката поставеност и се вративме на 3-4-2-1, системот што го користев кога дојдов во Наполи. Тоа беше единствено поради бројот на играчи од средниот ред со кои моментално располагаме, а тоа се Лоботка и Мектоминеј. Некои велеа дека Мектоминеј е жртвуван во овој систем, но според мене ова е исто така негова природна улога – тој е „box-to-box“ играч. Немавме друга опција, бидејќи единствена алтернатива е Елмас, а тоа всушност не е негова природна позиција, додека Вергара е од младинската академија и на крај ќе мора да игра, бидејќи ако еден од овие двајца играчи отпадне, немаме никој друг“, дополни стратегот.
„Овие момци секојдневно го докажуваат својот ентузијазам, глад и решителност. Тоа ни овозможи да го освоиме Скудетото минатата сезона – нешто неверојатно. Ќе направиме сè што можеме да го одбраниме и оваа сезона, надевајќи се дека нема да имаме уште долготрајни повреди“, додаде Конте.
Иако Рома ја контролираше топката во голем дел од натпреварот, единствената вистинска можност ја создаде во последната минута, кога Вања Милинковиќ-Савиќ со неверојатна одбрана со една рака го запре ударот на Томазо Балданци.
„Навистина сум среќен за момците, затоа што ова е момент кога мораме да ја облечеме оклопната облека и да влеземе во војна. Мораме да се справуваме со тоа што го имаме на располагање, но продолжуваме со овој ентузијазам – обединети и подготвени да ја надминеме секоја пречка на нашиот пат“, заврши Конте.
