Поранешната ѕвезда на Милан и Реал Мадрид, Рикардо Кака, ги коментираше шпекулациите дека може да стане дел од стручниот штаб на новиот селектор на Бразил, Карло Анчелоти.
„Ако од репрезентацијата сметаат дека можам да бидам од корист – јас сум подготвен. Кариерата ја завршив во 2017 година, и оттогаш се посветив на едукација. Имам завршено курс за спортски бизнис на Харвард и курс за спортски менаџмент при УЕФА, а покрај тоа и тренерска обука преку Бразилската фудбалска конфедерација. Играв на три мундијали и минав повеќе од 15 години со дресот на националниот тим. Ако се појави можност – со радост би се вратил“, изјави Кака за „Caze TV“.
Анчелоти сака во својот тим да го има добитникот на „Златна топка“. Се чини дека Кака е идеален профил – искусен, харизматичен и веќе подготвен со потребните знаења.
Италијанскиот стратег ќе дебитира како селектор на „селесао“ во квалификациите за СП против Еквадор на 5 јуни, а веќе на 10 јуни следи дуелот со Парагвај.
Инаку, синот на Анчелоти, Давиде, кој е негов помошник во Реал Мадрид, нема да биде дел од репрезентацијата, бидејќи планира самостојна тренерска кариера. Како можни опции за него се споменуваат Лајпциг и Глазгов Ренџерс.
