Базел по седумгодишна пауза повторно се врати на врвот на швајцарскиот фудбал. Во 35. коло од Суперлигата, тимот предводен од Фабио Селестино ја декласираше екипата на Лугано со 5-2 и така ја осигура 21. шампионска титула во својата историја.
Со оваа победа, Базел стана недостижен на врвот со 12 бодови предност пред второпласираниот Сервет и конечно ја прекина доминацијата на Јанг Бојс, кој во последните осум сезони освои шест титули. Тимот од Берн оваа сезона е на третата позиција со 14 бода заостанување зад новиот шампион.
Херој на натпреварот за „црвено-сините“ беше капитенот Џердан Шаќири, кој постигна хет-трик.
Џердан Шаќири имаше блескава сезона – со 18 голови и 20 асистенции во првенството, тој беше недвосмислено најдобриот играч на тимот и клучниот фактор за титулата на Базел.
