Баер Леверкузен сериозно го разгледува Чави Хернандез како можен наследник на Чаби Алонсо на тренерската позиција. Според информациите на угледните германски медиуми „Кикер“ и „Скај Германија“, раководството на клубот веќе стапило во контакт со поранешниот тренер на Барселона и не добило негативен одговор, што укажува на тоа дека Чави е отворен за потенцијална соработка.
Во случај Алонсо да ја напушти клупата по завршувањето на сезоната, Чави ќе биде еден од главните кандидати за неговата замена.
Името на Чави се издвојува поради неговото меѓународно искуство, доброто познавање на англискиот јазик, како и неговата тренерска филозофија базирана на посед и офанзивен фудбал – елементи кои совршено се вклопуваат во визијата на Баер Леверкузен.
Чави ја започна својата тренерска кариера во катарскиот клуб Ал-Сад, каде освои неколку домашни трофеи, а потоа ја презеде Барселона во ноември 2021 година. Со каталонскиот гигант успеа да ја освои Ла Лига и Суперкупот на Шпанија, при што посебно внимание посвети на развојот на млади играчи и имплементирање на позиционен стил на игра.
Генералниот директор на Баер Леверкузен, Симон Ролфес, во изјава за медиумите истакна дека клубот се подготвува за сите можни сценарија.
„Мојата работа е да бидам подготвен за различни ситуации, но можете да бидете сигурни дека ќе одам и чекор понатаму“, изјави Ролфес.
Освен Чави, во конкуренција за нов тренер на Баер Леверкузен се споменуваат и Ерик тен Хаг, поранешниот менаџер на Манчестер Јунајтед, и Иманол Алгуасил, кој најави заминување од Реал Сосиедад.
