Централниот дефанзивец на Реал Мадрид, Антонио Рудигер, избувна на крајот од финалето на Купот на Шпанија против Барселона, кое заврши со резултат 2-3.
Во напната ситуација во судиското продолжение, резервната клупа на Реал Мадрид бурно протестираше против одлука на судијата во 120+2 минута, а неколку играчи направија нервозни гестови кон него. Антонио Рудигер го грабна првиот предмет што му се најде при рака – шише – и го фрли кон де Бургос.
Главниот судија на финалето ја забележа ситуацијата и веднаш му покажа црвен картон на дефанзивецот. Поради сериозноста на инцидентот, според дисциплинскиот правилник на Фудбалската федерација на Шпанија, Рудигер се соочува со можна суспензија од 4 до 12 натпревари, што би можело да влијае на неговите настапи и во финишот на Ла Лига.
Црвени картони добија и Џуд Белингем и Лукас Васкес, но за нив се очекуваат поблаги казни, најверојатно суспензии од една до две средби, кои би се примениле во Купот на Кралот.
Рудигер едвај беше спречен од своите соиграчи и членовите на стручниот штаб на Реал Мадрид да не се нафрли врз де Бургос.
Камерите забележаа неверојатни сцени, на кои се гледа како Рудигер губи контрола и едвај е задржан од страна на Ферлан Менди, левиот бек на Реал.
Германецот беше стартер и одигра 110 минути, но физички не издржа и беше заменет 10 минути пред крајот, кога на теренот влезе напаѓачот Ендрик. На неговото место во одбраната влезе Аурелиен Чуамени.
Барселона го зададе решавачкиот удар во 116. минута, кога Кунде ја пресече топката на 30 метри од голот на противникот по лошо додавање на Модриќ и шутираше неодбранливо во далечниот агол, по земја. Барселона го освои Купот на Шпанија по 32. пат во својата историја.
