Валенсија оствари минимална, но многу вредна победа од 1-0 против Севилја во натпревар од 31. коло на шпанската Ла Лига. Херој на вечерта беше Хави Гера, кој во самиот финиш на првото полувреме ја смести топката во мрежата на Севилја и го реши натпреварот.
Иако гостите имаа повеќе обиди и создадоа повеќе шанси, одличниот Гиорги Мамардашвили го затвори својот гол и со неколку брилијантни интервенции ги сочува трите бода за Валенсија. Севилја доби и пенал по една контроверзна ситуација, но по ВАР прегледот, судијата ја повлече одлуката.
Клучниот момент се случи во четвртата минута од судиското продолжение на првото полувреме – Хави Гера мајсторски се ослободи во шеснаесетникот и по асистенцијата од Диего Лопез, прецизно ја погоди внатрешната страна од десниот дирек за 1-0.
Со оваа победа, Валенсија се искачи на 12. позиција со 37 бодови, додека Севилја останува веднаш зад нив, на 13. место со 36 поени.
