Германскиот првак Баер Леверкузен информираше за повредата на дефанзивецот на „аптекарите“, Марио Хермосо. Тој се здоби со повреда минатата недела за време на осминафиналниот пораз во Лигата на шампионите со 0-2 против Баерн Минхен, а сега е потврдено дека ќе го пропушти остатокот од сезоната.
„Марио Хермосо успешно беше опериран по повредата здобиена на натпреварот против Баерн. Нашиот дефанзивец ќе го пропушти завршниот дел од сезоната и сега ќе започне рехабилитација во Веркштат за што побрзо закрепнување. Ти посакуваме брзо враќање, Марио!“, се вели во официјалното соопштение на клубот од Леверкузен.
Ова е голем удар и за фудбалерот и за тимот, бидејќи Хермосо пристигна во Баер за време на зимскиот трансфер период и брзо се наметна како дел од првиот тим. Во малку повеќе од еден месец, тој одигра четири натпревари во Бундес-лигата, два во Лигата на шампионите и еден во Купот на Германија.
Баер Леверкузен го доведе Марио Хермосо од Рома, каде во претходната сезона настапи на осум натпревари во Серија А, четири во Лига Европа и еден во Купот на Италија.
Претходно, тој ги бранеше боите на шпанските клубови Еспањол и Атлетико Мадрид, а својата кариера ја започна во академијата на Реал Мадрид.
