Реал Мадрид го забележа дефанзивецот на Тотенхем, Кристијан Ромеро, како потенцијална трансферна цел за летото. „Кралскиот клуб“ сигурно ќе се засили во срцето на одбраната по проблемите што ги имаше оваа сезона, а аргентинскиот репрезентативец е меѓу најпосакуваните засилувања.
Тешките повреди на Давид Алаба и Едер Милитао го оставија Карло Анчелоти со многу малку опции во одбраната. Ова го принуди стратегот да му даде шанса на младиот Раул Асенсио, кој покажа добар потенцијал. Сепак, во клубот сметаат дека е неопходно да се донесе барем уште еден дефанзивец во летниот преоден рок.
Реал одамна го следи развојот на Кристијан Ромеро, а сега изгледа дека е вистинскиот момент да испрати официјална понуда. Во договорот на Аргентинецот нема откупна клаузула, па „кралевите“ ќе треба да достават доволно примамлива понуда за да го убедат Тотенхем да се раздели со еден од своите клучни фудбалери. Се верува дека ќе треба да платат најмалку 70 милиони евра за неговите услуги.
Сепак, Ромеро не е единствената опција за „кралевите“. На „Сантијаго Бернабеу“ размислуваат и за други засилувања во одбраната. Еден од кандидатите е Џеред Братвајт од Евертон, но тој би бил уште поскап, бидејќи „карамелите“ му поставиле цена од 80 милиони евра. Поизводлива опција е Јонатан Тах од Баер Леверкузен, чиј договор истекува, што значи дека може да биде донесен како слободен играч. Сепак, тој е пред договор со Барселона.
