Мигел Гутиерез, левиот бек на Џирона, е на чекор до трансфер во Атлетико Мадрид, откако ги договорил сите лични услови со клубот од шпанската престолнина. 23-годишниот фудбалер, кој е поранешен член на младинската школа на Реал Мадрид, беше внимателно следен од „кралскиот клуб“ поради клаузулата за право на првенствен откуп.
Сепак, Реал не се вмеша во преговорите, со што Атлетико доби „зелено светло“ да го реализира трансферот. Според медиумите од Шпанија, Гутиерез е мотивиран од можноста да работи под водство на Диего Симеоне и целосно ја прифатил понудената улога во новата екипа.
Иако откупната клаузула во неговиот договор изнесува 35 милиони евра, можно е Џирона да прифати и пониска сума. Гутиерез има договор со каталонскиот клуб до 2027 година, но се очекува летово да го напушти клубот, а Атлетико да го претстави како прво засилување за новата сезона.
Инаку, Реал Мадрид го продаде Гутиерез на Џирона во летото 2022 година за околу 4 милиони евра.
