Легендарниот бразилски клуб Крузеиро се врати во фудбалската елита на земјата. Ова стана факт по победата од 3-0 над Васко де Гама.
Клубот од Бело Хоризонте испадна пред 3 години, но откако легендата Роналдо стана негов сопственик, забележа сериозен подем и од следната сезона ќе игра со најдобрите.
Феноменот го купи Крузеиро минатата година и покажа големи амбиции кои веќе почнуваат да се остваруваат.
„Лисиците“ поведоа во 25. минута со голот на Фелипе Мачадо. По еден час игра Еду го удвои резултатот, а конечниот резултат го постави Луванор на четири минути пред крајот.
Така Крузеиро собра 68 бодови и на седум кола пред крајот е недостижен за едно од првите четири места во конечниот пласман кои носат промоција.
