Европскиот првак Пари Сен Жермен запиша втора победа во групната фаза на Светското клупско првенство, откако вечерва го совлада американскиот претставник Сиетл Саундерс со 2-0. Францускиот шампион одигра сигурен натпревар, а головите ги постигнаа Квича Кварацкелија во 35. и Ашраф Хакими во 67. минута.
Во вториот натпревар од групата, Атлетико Мадрид со минимални 1-0 го совлада бразилскиот Ботафого со голот на Антоан Гризман во самиот финиш на натпреварот – 87. минута. Сепак, и покрај победата, ова не беше доволно за „јорганџиите“ да обезбедат пласман понатаму.
Имено, ПСЖ, Ботафого и Атлетико Мадрид имаат по шест освоени бода, но поради послабата гол-разлика, тимот на Диего Симеоне ја заврши својата авантура на клупскиот мундијал уште во групната фаза.
Францускиот гигант, пак, го потврди статусот на фаворит и ќе ја продолжи борбата за светската круна.
