Францускиот гигант Пари Сен Жермен отпочнал разговори со Зинедин Зидан и му го понудил тренерското место на „светците“ доколку Маурисио Покетино одлучи веднаш да го раскине договорот и да се пресели на клупата на Манчестер Јунајтед. Англискиот премиерлигаш се раздели со Оле Гунар Солскјер, а прва желба на раководството на „црвените ѓаволи“ е токму Покетино.
Аргентинскиот стратег неофицијално трпи жесток притисок во ПСЖ, челниците бараат од него да ја освои Лигата на шампионите, и тој би се вратил назад во Премиер – лигата. Секако, „Олд Трафорд“ е локација од соништата за многу светски стратези и Покетино не сака да ја испушти оваа можност, иако во ПСЖ речиси и да има на располагање „дрим – тим“.
Зинедин Зидан донесе три европски круни за Реал Мадрид во Лигата на шампионите и сигурно е посакуван лик на „Паркот на принцовите“. Тој знае како се освојува трофејот во елитното европско клупско натпреварување.
