Селекторот на Полска, Михаел Пробиеж, поднесе оставка. Ова се случи неколку дена откако суперѕвездата на полскиот фудбал, Роберт Левандовски, објави дека се повлекува од репрезентацијата додека Пробиеж е на чело на тимот.
„Дојдов до заклучок дека во моменталната ситуација најдобро решение за доброто на националниот тим е мојата оставка од позицијата селектор. Вршењето на оваа функција беше исполнување на моите професионални соништа и најголемата чест во мојот живот“, се вели во официјалното соопштение на Пробиеж.
„Би сакал да им се заблагодарам на сите мои колеги, на вработените во Полската фудбалска федерација. Секогаш можев да сметам на вас. Му благодарам на претседателот и на управниот одбор на Полската фудбалска асоцијација за укажаната доверба. Секако, им благодарам и на сите фудбалери што имав чест да ги запознаам на мојот пат. Ќе навивам за сите вас, затоа што националниот тим е наше заедничко национално богатство. Би сакал да им се заблагодарам и на нашите прекрасни навивачи. Вие сте со нас и во добро и во лошо. Каде и да играше националниот тим, вашата поддршка секогаш се слушаше“, додаде поранешниот селектор на Полска.
