Фудбалерот за врска на Барселона, Гави, објави оптимистичка порака до навивачите од болничкото легло, опкружен со соиграчи, откако претходно беше опериран поради повреда на менискусот на десното колено.
Гави сподели фотографија на Инстаграм на која е заедно со Ламин Јамал, Роналд Араухо и Педри.
„Тие од вас кои ме познаваат, знаат дека ќе се враќам толку пати колку што е потребно за да ја бранам Барселона и соиграчите до крај“, напиша тој.
Гави беше подложен на хируршка интервенција во вторникот, а Барселона соопшти дека периодот на опоравување се очекува да трае од 4 до 5 месеци.
„Вистинскиот шампион не се формира во моменти на успех, туку во тие кога се крева по пад. Благодарам на сите за пораките и љубовта!“, напиша Гави.
Клубот истакна дека одлуката за операцијата е донесена по „интензивни спортски стрес-тестови“ спроведени по конзервативниот третман. Гави оваа сезона одигра само два натпревари за Барселона, и двата во август.
