Иван Перишиќ се повреди во последното коло во италијанскиот шампионат и ќе паузира еден месец. Тој ќе ги пропушти четирите јунски натпревари на хрватската репрезентација во Лигата на нации.
„Перишиќ денеска беше подложен на магнетна резонанца, по што беше утврдено дека поради повреда на листот ќе биде надвор од теренот околу еден месец. Селекторот Златко Далиќ и медицинската служба на хрватската репрезентација се во постојан контакт со Перишиќ“, објави ХНС.
Хрватската репрезентација се собира в понеделник на 30 мај, а во јуни ќе одигра четири натпревари во Лигата на нации – со Австрија (3 јуни во Осијек), Франција (6 јуни во Сплит), Данска (10 јуни во Копенхаген) и повторно Франција (13 јуни во Париз).
