Њукасл имаше желба да го здружи својот најдобар стрелец Александер Исак со Хуго Екитике, но наместо на „Сент Џејмс Парк“, оваа напаѓачка двојка најверојатно ќе ја гледаме во дресот на Ливерпул. Екитике веќе беше претставен како ново засилување на „Енфилд“, а Исак испраќа позитивни сигнали за трансфер.
Во Њукасл сега немаат друг избор освен да тргнат во потрага по нова „деветка“, а според доверливите информации од Англија, прва цел им е Словенецот Бењамин Шешко.
Шешко е еден од најбараните напаѓачи во светот. За 22-годишниот Словенец, кој постигна 27 голови во Бундес-лигата, најголем интерес досега покажале Манчестер Јунајтед и Ал Хилал.
Јунајтед се повлече поради високата цена од 77 милиони евра што ја побара Лајпциг, додека Шешко не беше подготвен за преселба во Саудиска Арабија.
Сега, приходот од евентуалната продажба на Исак, што може да достигне и до 150 милиони евра, Њукасл би можел да го насочи токму кон Шешко.
