Некогашниот шампион на Италија и финалист во Купот на европските шампиони, Сампдорија, вечерва доживеа историски дебајкл. Клубот од Џенова следната сезона ќе настапува во Серија Ц, третата италијанска лига.
По последното коло во Серија Б, Сампдорија заврши на 18. место, кое води во понизок ранг. Тимот одигра 0-0 на гости кај Јуве Стабија, но поради победите на Бреша, Фросиноне и Салернитана, тоа не беше доволно за опстанок. Сампдорија ја заврши сезоната со само 41 бод, со биланс од 8 победи, 17 ремија и 13 порази.
Сампдорија досега само пет пати настапувала во Серија Б, но никогаш претходно не испаднала во Серија Ц. Овој пад доаѓа во момент на сериозна финансиска криза – долгот на клубот надминува 200 милиони евра, од кои дури 70 милиони се акумулирани во последните две години.
Во април, по неколку промени на тренерската позиција, кормилото го презеде Албериго Евани, поранешен помошник на Манчини во репрезентацијата на Италија. Помошник му беше Атилио Ломбардо, а во обидот за спас се вклучи и самиот Роберто Манчини, клупска легенда со рекордни 567 настапи и 171 гол.
Манчини беше дел од „златната генерација“ која ја донесе единствената шампионска титула во историјата на Сампдорија во 1991 година, како и триумфот во Купот на победници на купови во 1990. Неговиот некогашен соиграч, покојниот Џанлука Вијали, пред својата смрт во 2023 година се обидуваше да го откупи клубот со група инвеститори – со цел повторно да ги обедини Манчини и Ломбардо во Сампдорија. Иако тој сон остана неисполнет за Вијали, денес делумно се остварува – но во најтешкиот момент за клубот.
