Струга е на седмо небо, има клуб кој ќе игра на европската сцена. Тимот на Срѓан Захариевски успеа во финишот на сезоната да го стори невозможното, ја надомести негативата во однос на Македонија ЃП и на крајот го освои посакуваното трето место.
Струга Трим Лум славеше минимален триумф (0-1) на гости против Силекс во Кратово добивајќи го клучниот меч за пласман на европска сцена. Еден од најдобрите поединци во составот на Струга ТЛ беше Клисман Цаке, кој од дефанзивец или дефанзивен играч за врска, се трансформираше во еден од најопасните фудбалери по голот на Силекс.
Со огромен радиус на движење, со нагласена желба да се оствари целта, Клисман Цаке ги влечеше кон напред и сите останати фудбалери од тимот, иако Струга ТЛ по 28.минута беше со играч помалку поради исклучувањето на Марјан Алтипармаковски.
Со настапот во Кратово, Клисман Цаке заслужи да биде избран за најдобар играч на 33.коло во Првата лига, во изборот на МАКФУДБАЛ.
