Пари Сен Жермен и Борусија Дортмунд приредија многу одлични моменти за навивачите во четвртфиналето на Лигата на шампионите и нивната полуфинална средба ветува дека ќе биде уште поголем спектакл, изјави тренерот на францускиот шампион Луис Енрике.
Двата тима успеаја да се квалификуваат по поразите во првите натпревари за пласман во полуфиналето. Пари Сен Жермен победи со 4-1 против Барселона откако загуби со 2-3 во Париз, додека Борусија Дортмунд го победи Атлетико Мадрид со 4-2 откако загуби со 1-2 во Шпанија.
„Мислам дека овој натпревар ќе биде голем спектакл, не само за навивачите на двата тима, туку и за сите што го сакаат фудбалот. Мислам дека ќе има голови со оглед на квалитетите на овие тимови“, изјави Луис Енрике.
Пари Сен Жермен никогаш претходно немаше надминато пораз на домашен терен во Лигата на шампионите и тренерот верува дека тоа може да им помогне на неговите играчи и во полуфиналната пресметка.
„Се надевам дека ова ќе не ослободи од притисокот бидејќи тоа е нешто што не сме го направиле претходно по пораз на првиот натпревар. Исто така, имаме искуство кое покажува колку е важно да се биде конкурентен”, додаде Енрике.
„Приказната е одлична, но нашата цел е да победиме вечерва. Не сакаме да ги оставиме работите на случајноста и да размислуваме за реваншот на Паркот на принцовите“, дополни стратегот на ПСЖ.
Борусија Дортмунд и Пари Сен Жермен играа и во групната фаза во ЛШ, а мечот во Германија на 13 декември заврши 1-1.
