Англискиот првак Ливерпул официјално го објави ангажманот на левиот бек Милош Керкез од Борнмут. Клубот од Мерсисајд ќе плати 40 милиони фунти за неговите услуги. Со тоа, 21-годишниот унгарски репрезентативец стана четврто ново засилување на „црвените“ ова лето, по Џереми Фримпонг и Флоријан Вирц од Баер Леверкузен, како и младиот голман и негов сонародник Армин Печи.
„Навистина сум среќен. За мене е огромна чест и привилегија да играм за најголемиот клуб во Англија и еден од најголемите во светот. Едноставно сум возбуден и со нетрпение чекам да започнам“, изјави Керкез за клупскиот сајт.
„Сега ќе се вратам дома неколку дена во мојот роден град, а потоа ќе се вратам за да ја облечам тренинг опремата и да започнам со подготовки за новата сезона“, додаде Унгарецот.
21-годишниот дефанзивец одигра 74 натпревари за Борнмут во сите натпреварувања, постигнувајќи два гола и асистирајќи за уште осум. Пред да дојде во Англија, неговата кариера го водеше низ унгарскиот Ѓер, италијанскиот Милан (2021) и холандскиот АЗ Алкмар, каде што запиша 57 настапи во текот на сезона и пол.
Керкез има 23 настапи за унгарската репрезентација, дебитирајќи против Германија во Лигата на нации во септември 2022 година. Една година подоцна, беше меѓу финалистите за наградата „Златното момче“, која се доделува на најдобрите млади фудбалери во Европа под 21 година, а за сезоната 2024/2025 беше номиниран за наградата на ПФА „Млад играч на годината“.
Керкез станува трет Унгарец во Ливерпул по Доминик Шобошлаи и 20-годишниот голман Армин Печи, кој исто така ова лето пристигна од Академија Пушкаш.
