Тренерот на Ајакс, Ерик Тен Хаг, за кој се вели дека е избор број 1 на раководството на Манчестер Јунајтед, доби нова понуда, овојпат Бундес-лигата. Според холандскиот „Де Телеграф“, предлогот е од германскиот бундеслигаш Лајпциг.
Раководството на „црвените бикови“ во 52-годишниот Холанѓанец гледа совршена личност која може да го менаџира проектот долги години и да го направи тимот вистински конкурент на Баерн Минхен за првото место во Бундес – лигата. Германскиот клуб изрази подготвеност да го плати обештетувањето кое го бара Ајакс за раскинувањето на договорот со Тен Хаг. Тоа изнесува 4 милиони евра.
Ерик тен Хаг е главен кандидат и за преземање на клупата на англискиот премиерлигаш Манчестер Јунајтед. Сепак, тој постави неколку услови за раководството на „ѓаволите“ доколку сметаат да го ангажираат. Првиот и категоричен услов е самиот да решава кои фудбалери од актуелниот состав ќе останат, а кои ќе мораат да заминат од „Олд Трафорд“. Тука има и имиња на кои нема да им се допадне ставот на Тен Хаг.
Доколку Тен Ха ја прифати понудата на Лајпциг, тогаш повторно фаворит за менаџерската функција на „Олд Трафорд“ ќе биде Маурисио Покетино, сегашниот тренер на Пари Сен Жермен.
