Беше здрав, мотивиран, наострен за борба, пукаше од сила, во полн налет од Ла Лига. Енис Барди, „моторот“ на Македонија на средината на теренот, на необичен, бизарен начин, заработи болна повреда на ’рбетот поради која ќе го пропушти најважниот меч во фудбалската историја на Македонија, финалниот дуел против Грузија за пласман на Европското првенство.
На последниот тренинг на арената „Тодор Проески“ во Скопје, Енис Барди се обиде да подели долга дијагонала, одеднаш се лизна и падна…Веднаш беше јасно дека нешто не е в ред, се жалеше на силни болки во ’рбетот, не можеше добро да се движи. Реагираше лекарскиот тим, но болките на Барди се влошија во текот на ноќта.
На крајот е констатирана повреда на Интервертебрален дискус со мускулен спазам. Тој во моментот не е подготвен за настап, не може да одигра фудбалски натпревар. Тоа е огромен хендикеп за фудбалската репрезентација на Македонија. Но, силата е во заедништвото, ќе одиграат соиграчите за него – Македонија да се пласира на Европско првенство.
