Наполи го совлада Лацио со 4-0 во ноќта посветена на легендарниот Диего Марадона. Беше откриена статуата на фудбалскиот бог, а потоа фудбалерите на Наполи одиграа величенствен натпревар. Елиф Елмас влезе во 64.минута на теренот и одигра половина час во бајката во која беше декласиран Лацио. Сега „наполитанците“ се осамени на врвот на табелата во Серија А со 35 бода, три повеќе од Милан и четири повеќе од Интер.
Пјотр Зиелински рано го отвори резултатот, а потоа следеа два гола на Дрис Мертенс уште во првиот дел. Во финишот и Фабијан Руиз се запиша меѓу стрелците за конечни 4-0.
