Торино ја продолжи импресивната форма во Серија А, триумфирајќи со минимални 1-0 против Емполи и одржувајќи ја серијата од четири натпревари без пораз.
Иако првото полувреме помина без голови и со поголема иницијатива на гостите, „биковите“ ја презедоа контролата во вториот дел. Клучниот момент се случи во 70. минута, кога хрватскиот ас Никола Влашиќ погоди за водство и победа на домашниот терен. Торино постигна уште еден гол, но истиот беше поништен по ВАР-интервенција.
Македонскиот репрезентативец Елиф Елмас одигра важна улога во успехот на својот тим. Тој беше стартер и остана на терен до 83. минута, кога беше заменет од Јан Карамо.
Со оваа победа, Торино се искачи на 11. место со 38 бодови, а во следното коло ќе се соочи со Лацио на гостински терен.
