Фудбалската репрезентација на Македонија утревечер (20.45 часот) го игра третиот меч во низа во септемвриските квалификации, а гостува Романија. Голманот Столе Димитриевски признава дека имал лоша реакција при првиот гол на Исланд во Рејкјавик, но се надева на добра игра против Романија и дека неговата мрежа нема да се тресе.
„На сите натпревари сум максимално посветен и размислувам да не примам гол. Исто ќе биде и против Романија. Јас направив индивидуална грешка против Исланд, потоа имавме психолошки пад и ја загубивме предноста. Но, брзо се вративме и имавме шанси за победа. Очигледно е дека на последните два натпревари, шансите што ги прават противниците се малубројни. Добро сме тимски поставени и компактни. Од моја гледна точка, ние одигравме одлични 75 минути на Исланд. Се надеваме на добра игра и позитивен резултат против Романија“, изјави Столе Димитриевски.
