Барселона има големи амбиции со Чави Хернандез на клупата. Тој добил ветување од претседателот Хоан Лапорта дека ќе добие неколку засилувања веќе во зимскиот преоден рок иако клубот се наоѓа во очајна финансиска ситуација. Но, фановите на „Камп Ноу“ бараат победи и моќен тим.
На Чави му е потребен фудбалер кој ќе може да игра како десно крило и централен напаѓач, а прва цел беше Рахим Стерлинг. Сепак, се чини дека тој е прескап, па сега во преден план се алтернативите од Челси, Хаким Зијеч и Тимо Вернер.
Зијеч е десно крило, се прослави на таа позиција во Ајакс и дојде во Челси, но кај Томас Тухел е главно резерва. Тимо Вернер не е класично крило, меѓутоа е брз и не му е туѓо да игра на било која позиција во нападот. Вернер би можел да дојде и на позајмица, исто како и Зијеч, но се чека одговорот на Челси.
