Рафиња е нов играч на Барселона. Каталонскиот клуб на својата официјална страница го објави доаѓањето на 25-годишниот Бразилец чие полно име е Рафаел Дијас Белоли. Тој ќе потпише договор до 2025 година.
Рафиња игра на десната крилна позиција и како централен напаѓач, а доаѓа од Лидс Јунајтед. Претходно во кариерата играше и за Рен, Спортинг и Виторија Гимараеш, каде дојде од бразилскиот клуб Аваи.
Барселона ќе плати 58 милиони евра, плус осум милиони бонуси за Рафиња. Интерес за бразилскиот репрезентативец, кој одигра девет натпревари и постигна три гола во националниот тим, покажаа и Челси, Арсенал и Тотенхем.
Сепак, Рафиња ја избра Барселона, која по Франк Кеси и Андреас Кристенсен, го реализира третиот трансфер ова лето.
Рафиња е во Премиер – лигата веќе две сезони, одигра 65 натпревари, постигна 17 гола и асистираше при 12 погодоци.
