Менаџерот на Арсенал, Микел Артета, зборуваше на прес-конференција пред вечерашниот реванш од полуфиналето во Лигата на шампионите против Пари Сен Жермен.
Лондонскиот тим има негатива од 0-1 од првиот натпревар на „Емирати“, а целта е јасна – пласман во финалето на „турнирот на богатите“ по вторпат во историјата на клубот. Првиот и засега единствен настап во финале беше во 2006 година, кога загубија од Барселона со 2-1.
„Тука сме за да победиме. Имаме нова голема можност да испишеме историја. Мораме да научиме од грешките што ги направивме на првиот меч и да ја искористиме оваа шанса“, изјави Артета.
Во првиот натпревар, ПСЖ стигна до минимален триумф благодарение на раниот гол и одличната партија на голманот Џанлуиџи Донарума. Но, Артета смета дека ништо не е готово.
„Имаме исто чувство како и кога игравме против Реал Мадрид – знаеме дека сѐ е можно. Разликата е само еден гол. Сè зависи од нас – како ќе започнеме, како ќе реагираме и како ќе се бориме до последната минута“, додаде стратегот на „топчиите“.
Артета истакна дека на вакви натпревари се создаваат шампиони, и апелираше за целосна поддршка од сите во клубот.
„Потребни ни се сите – и стартните 11, и резервите, и навивачите. Сите сме на мисија“.
Вечерашниот натпревар ќе биде клучен тест за овој млад и амбициозен тим на Арсенал.
„Играчите мора да бидат фокусирани само на играта. Очекуваме електризирачка атмосфера, но подготвени сме“, порача менаџерот на Арсенал.
