МАКФУДБАЛ.МК на Кипар,
Никола Ѓуровски
Нема на располагање голем број од стандардните првотимци, но селекторот Игор Ангеловски најавува дека Македонија ќе игра за да победи на утрешниот меч против Ерменија во Никозија, последен дуел од актуелниот циклус во Лигата на нации. Реми е доволно за да бидеме први, меѓутоа селекторот вели дека едноставно не знае да игра на нерешено.
„Не знам да играм на нерешено, тоа ми е маана. Знаете во изминатите пет години дека јас секогаш го подготвувам тимот да истрча и да игра на победа. Така ќе биде и утре против Ерменија, иако доволно е да не загубиме за да бидеме први во Лигата Ц и да се пласираме ниво погоре во Лигата на нации. Верувам во фудбалерите кои се повикани за овој меч и ќе направиме се за да ја оствариме и втората цел, да се пласираме во Лигата Б од ова натпреварување“, изјави селекторот Игор Ангеловски.
