Селекторот Игор Ангеловски му ја честиташе заслужената победа на противникот, изразувајќи жалење што отпорот на Македонија во Варшава беше скршен токму во моментите кога нашите фудбалери многу почесто создаваа опасни акции во противничката половина.
„Им честитам на Полјаците за победата, ние се обидовме со многу борба да ги дополниме отсуствата во тимот. Немам никакви забелешки за фудбалерите, кои дадоа се од себе во овие 90. минути. Како пресудни се покажаа искуството и квалитетот на Полска, која постигна гол во моменти кога се ослободивме од притисокот. Пред нас се уште два натпревари во овие квалификации, и ќе ги искористиме да завршиме што подобро на табелата. Австрија и Израел сега ќе ни бидат како подготовка за она што не чека во Лигата на нациите следната година“, изјави селекторот Игор Ангеловски на прес – конференцијата по натпреварот во Варшава.
