Одбранбениот фудбалер на Реал Мадрид, Дани Карвахал, ќе биде надвор од терените меѓу два и три месеци поради нова повреда. Клубот соопшти дека тој ќе мора да биде подложен на артроскопија за отстранување на слободно тело во десното колено.
Според шпанските медиуми, 33-годишниот десен бек ќе се опоравува меѓу два и три месеци, што практично значи дека најверојатно нема да игра повеќе до крајот на 2025 година.
Ова е нов удар за Карвахал, кој штотуку се опорави од друга повреда. Тој ги обнови тренинзите пред околу десет дена и влезе во игра во 72. минута на вчерашното „Ел Класико“, што беше негов прв натпревар од крајот на септември.
Добрата вест за Чаби Алонсо е што Трент Александер-Арнолд исто така се опорави и е подготвен да се врати на десната страна од одбраната. Алтернативна опција за таа позиција е и Федерико Валверде, кој против Барселона започна како десен бек.
Загрижувачки е фактот што проблемот на Карвахал е во истото колено во кое минатата сезона ги скина предните вкрстени лигаменти и се опоравуваше околу девет месеци.
