По повеќе од една деценија успешна соработка, Атлетико Мадрид и Диего Симеоне се сѐ поблиску до разделба.
Сезонава „јорганџиите“ испаднаа во групната фаза од Лигата на шампионите, а моментално се на третото место во Ла Лига, но не се во борба за шампионската титула, бидејќи имаат дури 17 бодови помалку отколку лидерот Барселона.
Се чини дека има заситеност, а со месеци се споменуваше дека Симеоне, чиј договор истекува летото 2024 година, би можел да го напушти Атлетико на крајот од сезоната.
Италијанскиот „Тутоспорт“ денеска ексклузивно пренесува дека мадриѓаните го пронашле наследникот на Симеоне во Серија А. Тоа е тренерот на Аталанта, Џанпјеро Гасперини.
Искусниот 65-годишен Гасперини е творец на модерната Аталанта, која се наметна во горниот дом на италијанската Серија А и имаше успешни епизоди во Лигата на шампионите.
Стилот на игра на Гасперини е сосема поинаков од оној на Симеоне. За разлика од Аргентинецот кој игра ултра дефанзивно и чека ривали на својата половина, за Гасперини важи спротивното.
Под негово водство Аталанта стана клуб кој се карактеризира со игра „човек на човек на целиот терен“, а таков начин на одбрана ретко се гледа во модерниот фудбал. Тоа би значело дека од следното лето би можеле да гледаме сосема поинаков Атлетико Мадрид.
