Германскиот клуб Штутгарт, кој моментно се наоѓа на 16. позиција во Бундес – лигата и без тренер е речиси два месеци, го назначи Бруно Лабадија за нов шеф на стручниот штаб.
Лабадија (56) претходно беше тренер на Штутгарт од 2010 до 2013 година. Тој потпиша договор на две и пол години, до 2025 година, соопшти клубот.
Поранешниот напаѓач на Баерн Минхен (1991-1994), беше тренер во Волфсбург (2018-2019) и во Херта Берлин (2020-2021).
Штутгарт имаше катастрофален прв дел од сезоната, почнувајќи со девет натпревари без победа.
Штутгарт, кој има само три победи од почетокот на сезоната, на 10 октомври ја прекина соработката со американскиот тренер Пелегрино Матарацо. Оттогаш, привремен тренер е Мајкл Вимер.
