Големото дерби на „Итихад“ меѓу Манчестер Сити и Ливерпул заврши без победник 2-2, но љубителите на фудбалот во целот свет можеа да уживаат во атомски фудбал. Сити водеше двапати со головите на Кевин де Бруин и на Габриел Жесус, но Ливерпул израмнуваше со головите на Диого Жота и на Садио Мане.
Ситуацијата на врвот на табелата остана идентична како и пред дербито, „граѓаните“ и понатаму имаат бод предност.
„Изгледаше како жесток боксерски натпревар“, изјави менаџерот на Ливерпул, Јирген Клоп по спектакуларниот меч. „Штом малку ги спуштите рацете, го симнете гардот, добивате силен удар. Каква игра! Дива! Интензитетот на играта беше ненормален. Резултатот е реален, со него можеме да живееме и едните и другите“, истакна германскиот стратег.
Капитенот на Ливерпул, Џордан Хендерсон, изјави дека „не е крај на светот што Ливерпул не забележал победа“.
„Има и позитивни и негативни страни на овој резултат. Сè уште сме во трката за титулата, но Сити не испушта многу бодови. Ако се сопнат, ќе мораме да го искористиме тоа. Ќе се бориме до крај“, порача Хендерсон.
