Пелистер и Вардар во Купот бараат спас на сезоната

Најтрофејниот македонски клуб Вардар му гостува на својот „вечен“ ривал Пелистер во чевртфиналето на Купот на Македонија. Иако во моментот се далеку од врвот на македонскиот фудбал, сепак, дуелите меѓу овие два клуба секогаш предизвикуваат посебно внимание. Така ќе биде и денеска (13 часот) под „Тумбе кафе“.

Вардар за првпат оваа сезона е во второлигашка конкуренција и се бори за враќање во елитата, но доби два силни удари со поразите од Силекс и од Воска. Во Купот гледа рехабилитација и спас на сезоната иако и понатаму враќањето во Првата лига е главниот приоритет.

„Ова е најголемото македонско дерби и без разлика на позициите во кои се наоѓаат двата клуба, секако носи посебен предизвик. Вардар сака да се пласира во полуфиналето на Купот и иако се игра еден меч, во Битола, подготвени сме за надигрување“, вели капитенот Дејан Блажевски.

Пелистер не е ништо подобар, напротив, се наоѓа на дното од прволигашката табела, без ниту една победа. Во минатото коло од Купот го елиминира Работнички по изведување пенали, а се надева дека ќе успее да триумфира и денеска против Вардар, па да се најде меѓу четирите најдобри екипи во најмасовното фудбалско натпреварување.

На останатите три натпревари од Купот на Македонија се среќаваат: Шкендија – Струга Трим Лум, Македонија ЃП – Шкупи, Силекс – Брегалница.