Женската фудбалска А репрезентација на Македонија вечерва (18 часот) на арената „Тодор Проески“ во Скопје ги продолжува квалификациите за СП. Во пресметката со Англија, Наташа Андонова и другарките не можеа да сторат ништо повеќе со оглед на квалитетот на домаќинот, но можеби денешниот меч со Австрија е можност да се оствари многу подобар резултат.
„Австрија не е на рамниште со квалитетот како Англија и сметам дека шансата за освојување на бодови треба да ја бараме на овој меч. Секогаш се обидувам да гледам реално на работите, така и овојпат. Мислам дека не треба да очекуваме некакво чудо во овие квалификации, треба само да продолжиме напорно да работиме и да ги слушаме советите од нашиот селектор. Објективен проблем претставува фактот што во овој состав на Македонија има фудбалерки претежно од домашното првенство кои немаат големо маѓународно искуство за разлика од другите селекции“, вели Наташа Андонова.
Австријките на првиот квалификациски меч од овој циклус остварија убедлива победа (1-8) против Летонија на гости.
