Реал Мадрид продолжува да чекори по тесниот пат кон одбраната на титулата во Ла Лига. „Кралскиот клуб“ синоќа третпат по ред победи со минимални 0-1, овојпат на гостувањето кај Хетафе, и со тоа повторно се доближи на само четири бодови зад лидерот Барселона.
Но, возбудата не застанува тука. Веќе овој викенд пред нас е уште една голема битка меѓу двата најголеми шпански ривали. Реал и Барселона ќе се судрат во финалето на Купот на Шпанија, а Карло Анчелоти пред мечот откри нови главоболки за својот тим.
„На лев бек имаме само една опција – Фран Гарсија. За жал, Камавинга и Алаба се надвор од комбинација поради мускулни повреди и нема да бидат подготвени за саботното финале“, изјави Анчелоти.
Што се однесува до фаворитската улога, искусниот стратег беше воздржан.
„Ова е дерби. А во дерби мечевите, ништо не е загарантирано. Но, важно е што ја завршивме работата против Хетафе и освоивме многу вредни три бода. Арда Ѓулер блескаше, верувам дека неговото вистинско место е во средниот ред, а не во нападот“, истакна италијанскиот стратег.
Реал и Барса веќе еднаш се сретнаа во финале оваа сезона, во Суперкупот, каде што каталонскиот гигант славеше убедливо со 5-2.
