Македонија ЃП оствари важен триумф над Шкупи (1-0) во 33. коло од Првата фудбалска лига и освои три важни бода во битката за опстанок. „Лавовите“ играат најдобро кога е најпотребно, а младиот стратег Александар Таневски умее да ја пронајде формулата за успех. Овој триумф му го донесе и епитетот најдобар тренер за 33.коло во изборот на МАКФУДБАЛ.
Таневски е задоволен од играта на Македонија ЃП и вели дека неговите фудбалери се најдобри кога се под притисок.
„Освоивме важни три бода во борбата за опстанок и се надевам дека со максимална ангажираност до крајот на шампионатот ќе успееме да обезбедиме опстанок во Првата лига. Беше тежок дуелот против Шкупи, со оглед дека за ривал имавме одличен тим, а психолошкиот товар беше огромен. Сепак, фудбалерите покажаа дека кога се под притисок играат најдобро. Задоволен сум од играат и се надевам дека ќе продолжиме во ист стил“, вели Александар Таневски.
Во следното коло Македонија ЃП му гостува на Работнички.
