Шкендија нов шампион, Вардар остана „жив“, Струга Трим Лум го освои Ѓорче Петров

Шкендија е нов фудбалски првак на Македонија откако тримфираше над Борец со 3-1 во Тетово и има недостижни 13 бода предност на четири кола до крајот на шампионатот. Борец поведе со автоголот на Егзон Бејтулаи во 13.минута, а пресвртот се случи во вториот дел. Мевљан Мурати го израмни резултатот во 62.минута, Бесарт Ибраими донесе пресврт во 69.минута, а потоа погоди и Рубин Хебај.

Шкупи со 2-0 го совлада Работнички, со два гола во финишот од дуелот. Матеј Цветаноски со удар со глава погоди во 79.минута, а Бесар Исени во 89.минута зголеми на 2-0.

Струга Трим Лум го освои Ѓорче Петров со фудбалер помалку славејќи против Македонија ЃП со 2-3, во неверојатно драматичен натпревар. Робсон да Силва во 41.минута од пенал ги доведе „лавовите“ во водство, а Струга Трим Лум остана со играч помалку во 72.минута по исклучувањето на Фламур Таири. Израмни Марјан Алтипармаковски од пенал во 84.минута, а Немања Босанчиќ со прекрасно изведен слободен удар донесе пресврт во 90.минута. Но, и тоа не беше се.

Филип Алексовски во 92.минута израмни на 2-2, а во последната минута беше досуден уште еден пенал што го реализираше Алтипармаковски за конечни 2-3.

Вардар со 1-0 ја совлада Беласица и остана во живот за опстанок. Виктор Крстевски во 31.минута го постигна победничкиот гол за вардарци, а Беласица од 64.минута играше со фудбалер помалку по исклучувањето на Христијан Чукарски.

Пелистер со 1-0 ја совлада Ренова. Омар Гудијаби во 24.минута ја затресе мрежата на Ренова, а Давор Талески во вториот дел успеа да одбрани пенал. Тој го скроти ударот на Ален Јашароски од белата точка во 57.минута, а потоа интервенираше феноменално и од вториот обид кога шутираше Ненад Мишковски.

ПРВА ЛИГА, 29. КОЛО – РЕЗУЛТАТИ

ШКЕНДИЈА – БОРЕЦ 3-1

МАКЕДОНИЈА ЃП – СТРУГА ТРИМ ЛУМ 2-3

ВАРДАР – БЕЛАСИЦА 1-0

ШКУПИ – РАБОТНИЧКИ 2-0

ПЕЛИСТЕР – РЕНОВА 1-0

ВЧЕРА: СИЛЕКС – АКАДЕМИЈА ПАНДЕВ 3-2