Селекторот на Англија, Герет Саутгејт е подготвен да остане на својата функција, тврди британскиот „Телеграф“. 52-годишниот стратег даде позитивни сигнали кои ги наведоа челниците на ФА на Англија да веруваат дека тој ќе продолжи да ја води селекцијата на гордиот Албион.
Првично се веруваше дека Саутгејт ќе поднесе оставка по елиминацијата од Светското првенство, но сега ситуацијата е поинаква. Квалитетниот настап против Франција во четвртфиналето, и покрај поразот, го промени ставот на јавноста кон работата на Саутгејт, кој претрпе многу критики во изминатите две години и покрај успесите под негово водство.
Договорот на поранешниот дефанзивец е до крајот на 2024 година. Желбата на ФА е тој што поскоро да даде одговор дали ќе го исполни до крај. Се очекува конечната одлука да ја донесе на почетокот на следната година.
