Фиорентина и Јувентус одиграа тврд и неизвесен меч на „Артемио Франки“, а саботното дерби од 12. коло во Серија А заврши без победник, 1:1.
Средбата стартуваше со многу емоции и контроверзи. Во 14. минута, Душан Влаховиќ влезе во дуел со Пабло Мари, падна во шеснаесетникот и судијата веднаш досуди пенал. Но ВАР се вмеша и пресуди дека токму Влаховиќ бил тој што прв повлекол, па одлуката беше поништена. Таа ситуација само ги засили навредливите и делумно расистички повици од трибините насочени кон српскиот напаѓач.
Најсериозната шанса за Фиорентина дојде во 25. минута. Моисе Кин ја поведе полуконтрата, реши сам да финишира, но ја погоди само гредата. Потоа се закани и Паризи, но мрежите мируваа сè до самиот финиш на првиот дел.
Во шестата минута од судиското продолжение на првото полувреме, Филип Костиќ ја проби одбраната на домашните. Прими топка на дваесетина метри и со силен и прецизен удар го совлада Давид де Хеа, носејќи му водство на Јувентус.
Но Фиорентина експресно возврати. Веднаш по продолжувањето на мечот, во 48. минута, Роландо Мандрагора испрати бомбастичен шут од околу 30 метри и го погоди аголот за израмнување – вистински погодок за ТВ-ревии.
До крајот, Јувентус беше поактивен. Де Хеа блесна со одбрана по ударот со глава на Меккени, а Камбијасо постојано создаваше проблеми долж десната страна. Сепак, конечниот исход не се промени.
Двата тима мораа да се задоволат со бод, иако секој имаше периоди кога можеше да го реши мечот во своја корист.
