Лаутаро Мартинез беше еден од хероите за Интер во победата од 0-2 против Феенорд во првиот натпревар од осминафиналето во Лигата на шампионите. Аргентинецот го постигна вториот гол на натпреварот и со тоа стигна до 18 погодоци за „нероаѕурите“ во најпрестижното европско натпреварување, станувајќи најдобриот стрелец на клубот во оваа конкуренција.
„Гордост е првиот збор што ми паѓа на ум. Никогаш не сум замислувал дека ќе постигнам вакво нешто. Му благодарам на Интер, на навивачите и на соиграчите. Исто така, огромна благодарност до моето семејство, како во Италија, така и во Аргентина, бидејќи секогаш ме поддржуваат, и во добрите и во лошите моменти“, изјави Лаутаро.
„Играме натпревари на секои два дена веќе осум месеци. Многу од играчите настапуваат и за своите национални тимови, но сепак се обидуваат да дадат сè од себе за клубот. Навистина страдавме против Феенорд, а мислам дека Бастони заслужуваше да биде избран за ‘играч на натпреварот’ поради сите жртви што ги направи“, додаде Аргентинецот.
