ФФМ го пушти во употреба новиот терен во Илинден

Фудбалската федерација на Македонија (ФФМ) во општина Илинден го пушти во употреба новиот терен со вештачка трева, проект реализиран од програмата Форвард на ФИФА во соработка со Општина Илинден.

„ФФМ ќе продолжи да инвестира во вакви инфраструктурни проекти ширум државата. Овие инвестиции се за младите, за клубовите и за развојот на македонскиот фудбал,“ истакна претседателот на ФФМ“, Масар Омерагиќ.

Проектот опфати комплетна реконструкција и проширување на фудбалскиот терен со поставување на нова вештачка трева и нова заштитна ограда, како и изградба на систем за дренажа и одводнување. Во следната фаза ќе биде изградена нова трибина со капацитет од 1100 гледачи, како и нови административни и технички простории, соблекувални и осветлување.

Градоначалникот на општина Илинден, Александар Георгиевски во своето обраќање истакна дека со отворање на новиот стадион, Илинден добива повеќе од само спортски објект, добива центар за заедништво, младински развој и спортски дух.

„Илинден доби модерен фудбалски стадион. Ова не е само терен, туку симбол за посветеноста кон младите, спортот и иднината на нашата општина,“  истакна градоначалникот Георгиевски.