Од следната сезона, најталентираните фудбалерки во Холандија ќе можат да играат во машки тимови на највисоко ниво на аматерско фудбалско натпреварување.
Според холандските медиуми, а потврдено од Куќата на фудбалот во Холандија, оваа одлука може да биде историски момент за аматерскиот фудбал во „земјата на лалињата“, но и низ целиот свет, со оглед дека досега „мешаните“ машки и женски екипи беа дозволени само во помлади возрасни категории.
„Ова е модерно време, и во согласност со тоа, не гледаме причина да се држиме до застарените правила. Направивме истражување што ја потврди нашата претпоставка и сите се залагаме за различноста, но исто така и за родовата еднаквост. Наша желба е да им го понудиме на девојките и на жените местото во фудбалот што го заслужуваат со нивниот квалитет и амбиција“, изјави Јан Дирк ван де Зи, шеф на Здружението на аматерски фудбалски клубови во Холандија.
Експеримент со жени во машки тим веќе е испробан во Холандија оваа сезона, Елен Фокема, 19-годишна фудбалерка, играше за локалниот машки тим Форут во четвртата лига, но шампионатот беше прекинат поради коронавирус по само седум кола.
