Бразилскиот репрезентативец и играч на Барселона, Рафиња, изразил сериозно незадоволство од поранешниот тренер на Реал Мадрид и сегашен селектор на Бразил, Карло Анчелоти. Причината за тензијата е напорната програма на фудбалерот за време на светските квалификации во Јужна Америка.
Според информациите, Рафиња бил исклучително уморен по дуелот против Чиле, на кој одигра 80 минути. И покрај тоа, Анчелоти го вклучи и во следниот меч против Боливија, кој се одигра во тешки услови – на голема надморска височина и при ниски температури. Одлуката на тренерот предизвикала силно незадоволство кај фудбалерот, кој сметал дека заслужува одмор.
Новинарот Хоаким Пиера објави дека Рафиња се чувствува „огорчен“ и дури „понижен“ од ситуацијата, особено бидејќи дел од ѕвездите на Реал Мадрид биле поштедени и не настапиле толку активно. Тоа создава чувство на пристрасност и различен однос кон играчите на Барселона и Реал.
Медиумите во Шпанија и Бразил коментираат дека тензијата меѓу Рафиња и Анчелоти може да прерасне во посериозен конфликт доколку ситуацијата не се надмине. Од Барселона засега нема официјална реакција, но јасно е дека ваквите ситуации негативно влијаат врз физичката и психичката состојба на играчот.
