Пред две години Елмас беше момче, сега е „ѕвер“ – за новата пресметка со Украинците

Во Букурешт загубивме 2-1. Тогаш Јармоленко и Зинченко беа премиерлигашки ѕвезди, а Елиф Елмас беше момче кое надоаѓа во европскиот фудбал.

Сега работите се променија. Дијамантот се избруси во Италија, освои шампионска титула и стана „ѕвер“. Јасно е дека тој треба да ја носи на свои плеќи Македонија, откако Бате Горан се пензионира, токму на Европското првенство.

Ќе добие вечерва Елмас улога што му одговара, на левата крилна позиција, за да може да продре кон внатре и да биде директна опасност по голот на Украинците.

Искусниот Нестор треба да биде во шпицот, а ќе го има некогашниот партнер Алекс Трајковски од другата, десна страна. Како тој умее да погоди – добро знаат Италијанците. Инфаркт ги стегна среде Палермо.

По подолго време, и воинот Аријан Адеми ќе биде во тимот, можеби и кога е најпотребно, за големата битка во средниот ред против Украина. Таму ќе се крши мечот, а Адеми секако ќе има голема помош во Барди, Алиоски, Атанасов, Стефан Ристовски. Има Македонија адути од кои сигурно стравува и Сергеј Ребров, иако пред три дена неговиот тим играше против силната Германија во Бремен.

„Ако сакаме да одиме напред, треба да размислуваме за победа. Нема да биде лесно, но ништо не е лесно во европскиот фудбал. Веруваме во нашите квалитети и се надеваме дека со поддршка од публиката ќе стигнеме до посакуван резултат“, најави капитенот Стефан Ристовски.

Вечерва на арената „Тодор Проески“, Македонија го игра вториот натпревар од квалификациите за ЕВРО 2024. Нека биде победнички – како и на стартот против Малта.