Светската меѓународна фудбалска асоцијација (ФИФА) одлучи руската репрезентација во иднина да игра како домаќин на неутрален терен и без употреба на државни симболи, што не ги израдува Полјаците.
Откако започна воената операција на Русија во Украина, Полјаците одбија да играат против оваа земја во плејофот за одење на Светското првенство. По одлуката на ФИФА дека „зборнаја“ може да се натпреварува под поинакви услови, Полјаците тоа го оценија како неприфатливо.
„Одлуката на ФИФА е неприфатлива за нас. Нашиот став останува ист – репрезентацијата на Полска нема да игра против Русија во плејофот за Светското првенство, без разлика на името на рускиот тим“, изјави Цезариј Кулеша, претседател на Фудбалската федерација на Полска.
Според досегашниот план, Русија на 24 март во Москва треба да игра против Полска, додека Шведска треба да се сретне со Чешка. Победниците од двата меча се закажани да се сретнат на 29 март.
