Голот на Нејмар донесе исклучително вредна победа за Сантош во дуелот против лидерот Фламенго во 14. коло од бразилското првенство. 33-годишниот офанзивец погоди во 84. минута за триумфот од 1-0 на домашен терен, откако пред овој натпревар Сантош се наоѓаше во зоната за испаѓање. Тоа беше 700. гол на Нејмар во кариерата.
Нејмар доби додавање од Гилерме во шеснаесетникот, мајсторски се сврте и го совлада голманот на Фламенго, Агустин Роси. Ова беше прв погодок за поранешната ѕвезда на Барселона и Пари Сен Жермен од почетокот на сезоната. Освен тоа, за првпат остана на теренот цел натпревар – сите 90 минути.
Натпреварот ќе се памети и по дебито за Сантош на 17-годишниот Робињо Жуниор – синот на поранешниот бразилски репрезентативец Робињо. Талентираниот напаѓач влезе во игра во 65. минута.
Слично како татко му, и Робињо Жуниор го носи дресот со број „7“. Минатата година тој го потпиша својот прв професионален договор со Сантош. Договорот важи до 2027 година, а откупната клаузула изнесува 53,5 милиони долари.
„Робињо Жуниор е многу талентирано момче. Ми е драго што можам да му помогнам. Го познавам уште од дете, а сега веќе играме заедно“, изјави Нејмар по натпреварот.
На почетокот од својата кариера, Нејмар беше под закрилата на Робињо, кој моментално издржува затворска казна во Бразил поради силување. Сега, ѕвездата на Сантош е во улога на ментор на синот на својот добар пријател.
