Еден од најбогатите Британци, Сер Џејмс Ретклиф, даде неверојатна понуда од 4,25 милијарди фунти за купување на Челси. Роман Абрамович побара нешто повеќе од 2 милијарди фунти за клубот што го купи во 2003 година, а сега Ретклиф речиси ја удвои оваа сума.
Според „Тајмс“, 69-годишниот лидер на „Инеос“, кој пораснал како навивач на Манчестер Јунајтед, вчера разговарал со претседателот на Челси, Брус Бак.
„Ние дадовме понуда утрово. Ние сме единствените Британци што доставивме понуда. Нашите мотиви се едноставно да се обидеме да создадеме многу добар клуб во Лондон. Немаме мотив за профит бидејќи заработуваме пари на други начини”, рече Ретклиф.
„Можеме да одиме многу брзо. Вчера се сретнав со Брус и реков дека би сакале да доставиме понуда, што го направивме ова утро. Челси е национално добро. Кога ќе помислите на статусот на Лондон во европската фудбалска заедница, градот нема клуб како Баерн Минхен, Реал Мадрид или Барселона, да доминира во Лигата на шампионите некое време. Тоа е нашата амбиција – да создадеме таков клуб за Лондон“.
Сер Џејмс Артур Ретклиф е британски милијардер, хемиски инженер со седиште во Монако, кој стана финансиер и индустријалец. „His Ineos“ е британска мултинационална хемиска компанија со седиште во Лондон. Од 2021 година, таа е четврта по големина хемиска компанија во светот.
