По освојувањето на Светското првенство со Аргентина, Лионел Меси сега треба да донесе важна одлука за својата иднина. На 35-годишниот напаѓач му истекува договорот со Пари Сен Жермен и тој има неколку опции пред себе.
Едно е сигурно, Меси сигурно ќе ја продолжи кариерата во Европа и нема да прифаќа понуди од Блискиот Исток, открива „Спорт“. Сѐ поблиску е и до заминување од Париз, а негова голема желба е да се врати во Барселона. Наводно тоа го одлучил овој викенд, откако доби свирежи од навивачите на ПСЖ, кои го обвинија дека е еден од главните виновници за неуспехот на тимот во Лигата на шампионите оваа сезона.
Сепак, голем проблем за неговото враќање на „Камп Ноу“ е финансиската ситуација во која се наоѓа Барселона. Каталонскиот гигант треба да изнајде 200 милиони евра за да го задоволи финансискиот фер-плеј, а евентуалниот ангажман на Лионел Меси засега изгледа невозможен.
